L’assicuranza per invaliditad (AI) è in’assicuranza sociala obligatorica per tut la Svizra. Ella sustegna persunas assicuradas ch’èn periclitadas u pertutgadas d’invaliditad cun mesiras d’integraziun. La finamira è da permetter a persunas assicuradas da procurar autonomamain, dal tuttafatg u parzialmain, per lur basa d’existenza. Sch’ina tala (re)integraziun n’è betg pussaivla u mo per part, surpiglia l’AI ina renta (parziala).
Il team coordinaziun integraziun/renta da l’Uffizi da l’AI elavura dumondas per mesiras d’integraziun professiunalas e per rentas, e quai da l’annunzia fin a la disposiziun. Durant la fasa d’integraziun vegn l’incumbensa surdada a moda speditiva e differenziada a las collavuraturas ed als collavuraturs dals teams integraziun e cussegliaziun professiunala. Vus eruis, sch’igl è avant maun potenzial d’integraziun e sche las premissas giuridicas essenzialas èn ademplidas. Uschespert ch’èn tratgas a niz las mesiras d’integraziun medicinalas e professiunalas, verifitgais Vus il dretg a prestaziuns da renta e disponis surlonder. Vus collavurais stretgamain cun il servetsch medical regiunal ed essas la persuna da contact per partenaris interns ed externs quai che reguarda Voss sectur da cumpetenza.
Vus avais terminà cun success Vossa scolaziun da basa commerziala ed avais experientschas professiunalas sin il sectur da las assicuranzas socialas. En il cas ideal avais Vus gia il certificat professiunal d’assicuranzas socialas u avais interess d’acquistar quel. Vus essas ina persunalitad engaschada ed abla da lavurar sut squitsch e disponis da bunas abilitads communicativas en tudestg e cun preferenza en talian. En pli essas Vus disada/disà d’agir en atgna responsabladad ed As interessais per disposiziuns legalas e per dumondas medicinalas. Plinavant avais Vus ina vista globala ed As occupais a moda flexibla cun las sfidas d’in conturn dinamic.