Ensemen per il Grischun
L'unic chantun triling da la Svizra è in chantun multifar tant en quai che reguarda l'economia, la cultura sco er la politica. Cun 7106 km² è il Grischun il pli grond chantun da la Svizra e cun 150 valladas, 615 lais, 140 lieus da vacanzas e nundumbraivels dis da sulegl per onn porscha el in'auta qualitad da viver. L'administraziun chantunala dal Grischun è gist tuttina variada sco nossa cuntrada.
L'Uffizi per l'execuziun giudiziala dal Grischun (UEG) è in post da servetsch dal Departament da giustia, segirezza e sanadad dal chantun Grischun. Il UEG è responsabel per l'execuziun da chastis e da mesiras sco er dals differents geners d'arrest. En il Grischun vegn l'execuziun da chastis e da mesiras pia reglada sco champ tematic unitar e sco incumbensa cumplessiva. Cun l'intent d'impedir ulteriurs acts criminals lavuran differents geners da professiuns en moda interdisciplinara – tenor gruppas professiunalas – cun persunas che han commess malfatgs.
Il Stabiliment giudizial Cazas Tignez ha circa 110 collavuraturas e collavuraturs e dispona da 150 plazs da detenziun per l'execuziun serrada. Var 100 da quests plazs èn per l'execuziun normala, 10 per la partiziun d'entrada, 28 per l'execuziun speziala e 12 per l'arrest d'inquisiziun.
Pervia d'in pensiunament tschertgain nus per il 1. da favrer 2027 u tenor cunvegna ina collavuratura u in collavuratur Assistenza.
Voss champ d'incumbensas
- Survegliar, assister e manar persunas collocadas da differents spazis culturals entaifer las structuras dal di e las differentas furmas d'execuziun en las gruppas d'abitar
- Esser la persuna da contact directa en cas da dumondas e da giavischs da las persunas collocadas
- Ensemen cun il team surpigliais Vus la responsabladad per la concepziun dal mintgadi e dal temp liber da las persunas collocadas en las gruppas
- Scriver rapports e documentar eveniments
- Garantir e coordinar in andament ordinà dal manaschi resguardond las basas legalas sco er las prescripziuns e las reglas relevantas da l'execuziun e da la segirezza
- Prestar servetschs da la damaun, da la saira e da la fin d'emna
Quai che nus giavischain da Vus
- In emprendissadi terminà d'almain 3 onns cun AFQ u ina scolaziun equivalenta
- Ina persunalitad equilibrada, flexibla, abla da schliar conflicts sco er da supportar squitsch fisic ed er psichic cun ina gronda cumpetenza sociala
- Plaschair da lavurar en in team sco er da collavurar sin plaun interdisciplinar
- Il contact cun persunas da differentas culturas, ch'èn en situaziuns da vita difficilas, vesais Vus sco sfida positiva
- Bunas enconuschientschas dal tudestg (almain C1); ulteriuras enconuschientschas da las linguas chantunalas e da linguas estras èn d'avantatg
- Bunas abilitads d'utilisar il computer
- Permiss da manischar da la categoria B
- Prontezza d'absolver la scolaziun sco spezialista u spezialist per l'execuziun giudiziala
- Conduita irreproschabla (naginas inscripziuns en il register penal ed en il register da scussiun)
Nus ans legrain da Vossa annunzia online e da far Vossa enconuschientscha.