Ensemen per il Grischun
L'unic chantun triling da la Svizra è in chantun multifar tant en quai che reguarda l'economia, la cultura sco er la politica. Cun 7106 km² è il Grischun il pli grond chantun da la Svizra e cun 150 valladas, 615 lais, 140 lieus da vacanzas e nundumbraivels dis da sulegl per onn porscha el in'auta qualitad da viver. L'administraziun chantunala dal Grischun è gist tuttina variada sco nossa cuntrada.
Per il 1. da schaner 2027 tschertgain nus – per la durada d'in onn – ina persunalitad engaschada e fidada per in voluntariat en il sectur Conservaziun / restauraziun (80 %). Pervia da la renovaziun e da l'engrondiment dal local da protecziun dals bains culturals vegn l'entir inventari da la collecziun dischlocà il cumenzament da l'onn 2028 temporarmain en in deposit d'art extern. En il rom dal voluntariat ans gidais Vus en spezial a preparar las ovras d'art per la dischlocaziun, e quai en reguard conservatoric ed organisatoric.
Voss champ d'incumbensas
- Far analisas conservatoricas e restauratoricas d'ovras d'art en il rom da la dischlocaziun dal deposit
- Far protocols dal stadi e documentaziuns fotograficas
- Fixar tips d'emballadi adattads per il transport sco er per l'emballadi professiunal da las ovras d'art
- Collavurar organisatoricamain a la preparaziun ed a la realisaziun da la dischlocaziun dal deposit
- Planisar e realisar en moda professiunala las restauraziuns
Quai che nus giavischain da Vus
- Diplom da scola auta terminà en conservaziun e restauraziun (bachelor u master)
- Experientscha pratica en il tractament conservatoric e restauratoric d'ovras d'art
- Tractar en moda segira e cun quità las ovras d'art
- Moda da lavurar independenta, fidada e structurada
- Prontezza da collavurar e da sa barattar professiunalmain en il team
Nus ans legrain da Vossa annunzia online e da far Vossa enconuschientscha.