Ensemen per il Grischun
L'unic chantun triling da la Svizra è in chantun multifar tant en quai che reguarda l'economia, la cultura sco er la politica. Cun 7106 km² è il Grischun il pli grond chantun da la Svizra e cun 150 valladas, 615 lais, 140 lieus da vacanzas e nundumbraivels dis da sulegl per onn porscha el in'auta qualitad da viver. L'administraziun chantunala dal Grischun è gist tuttina variada sco nossa cuntrada.
L'Uffizi per l'execuziun giudiziala dal Grischun (UEG) è in post da servetsch dal Departament da giustia, segirezza e sanadad dal chantun Grischun. Il UEG è responsabel per l'execuziun da chastis e da mesiras sco er dals differents geners d'arrest. En il Grischun vegn l'execuziun da chastis e da mesiras pia reglada sco champ tematic unitar e sco incumbensa cumplessiva, nua che differentas gruppas professiunalas lavuran en moda interdisciplinara cun persunas che han commess malfatgs, per impedir ulteriurs acts criminals.
Il Stabiliment giudizial Cazas Tignez ha circa 110 collavuraturas e collavuraturs e dispona da 150 plazs da detenziun per l'execuziun serrada. Var 100 da quests plazs èn per l'execuziun normala, 10 per la partiziun d'entrada, 28 per l'execuziun speziala e 12 per l'arrest d'inquisiziun.
Per il 1. d'avust 2026 u tenor cunvegna tschertgain nus ina manadra u in manader dal sectur Segirezza
Voss champ d'incumbensas
- Manar il sectur Segirezza en reguard professiunal, persunal ed organisatoric
- Manar, promover e sviluppar las 24 collavuraturas e collavuraturs suttamess, dals quals trais èn suttamess directamain, e sustegnair els en lur incumbensas
- Garantir durant 24 uras a di, ch'il manaschi dal stabiliment giudizial funcziunia senza incaps, quai areguard tut las proceduras e tut ils indrizs relevants per la segirezza, incl. la centrala
- Garantir la segirezza interna ed externa sut ils aspects da la segirezza dinamica e cun observar ed exequir l'urden da chasa
- Emprima persuna da contact per ils partenaris da lavur da las organisaziuns a glisch blaua
- Responsabladad per l'organisaziun d'eveniments e da cas d'urgenza dal stabiliment giudizial
- Elavurar e sviluppar vinavant concepts da segirezza e d'eveniments che correspundan als basegns, incl. las documentaziuns respectivas
- Responsabladad per l'organisaziun da transports e per la surveglianza externa da las persunas collocadas
- Manar unitads da perfecziunament areguard eveniments relevants per la segirezza
- Far part dal cader dal stabiliment e prestar servetsch da pichet a las fins d'emna
Quai giavischain nus da Vus
- Terminaziun d'ina scolaziun superiura en il sectur da segirezza u en in sectur spezial parentà, cun experientscha professiunala da plirs onns
- Plirs onns experientscha da direcziun – en il cas ideal en l'execuziun giudiziala u en in sectur da segirezza sumegliant
- Furmaziun supplementara en il sectur da la tecnica da segirezza sco er experientscha da planisar e da realisar projects
- Gronda cumpetenza sociala, empatia, flexibilitad sco er abilitads communicativas adequatas als adressats
- Forza da persvader ed abilitad d'agir en moda reflectada ed orientada a soluziuns sco er capacitad da prender decisiuns en moda segira e cun responsabladad
- Fitg buna expressiun en scrit ed a bucca per tudestg; enconuschientschas supplementaras da las linguas chantunalas e da linguas estras èn d'avantatg
- Fitg bunas enconuschientschas da l'informatica sco er chapientscha tecnica, permiss da manischar da la categoria B
- Ina conduita irreproschabla (naginas inscripziuns en il register penal ed en il register da scussiun)
Nus ans legrain da Vossa annunzia online e da far Vossa enconuschientscha.