Ensemen per il Grischun
L'unic chantun triling da la Svizra è in chantun multifar tant en quai che reguarda l'economia, la cultura sco er la politica. Cun 7106 km² è il Grischun il pli grond chantun da la Svizra e cun 150 valladas, 615 lais, 140 lieus da vacanzas e nundumbraivels dis da sulegl per onn porscha el in'auta qualitad da viver. L'administraziun chantunala dal Grischun è gist tuttina variada sco nossa cuntrada.
L'Uffizi da construcziun bassa è cumpetent per la projectaziun, la construcziun, il mantegniment e la gestiun da las vias chantunalas sco er per la correcziun dals curs d'aua e per il traffic plaun en il Grischun. Plinavant ans occupain nus dal mantegniment funcziunal da las vias naziunalas sin il territori chantunal. Cun introducir il management da la mobilitad en l'interpresa è tranter auter er vegnì centralisà il management dal parc da vehichels chantunal, quai per garantir in manaschi pli economic e pli ecologic. Sco post spezialisà per il traffic betg motorisà coordinain nus la planisaziun e la construcziun dals indrizs dal traffic plaun. Il traffic plaun cumpiglia spezialmain il traffic da peduns, il viandar, il traffic da velo e da velo da muntogna sco er la mobilitad cun apparats sumegliants a vehichels.
Sco uffizi certifitgà cun «Friendly Work Space» ans stattan la sanadad e la cuntentientscha da nossas var 480 collavuraturas e collavuraturs tut spezialmain a cor. Per quest motiv ans engaschain nus a favur d'in management da sanadad sistematic en l'interpresa (MSI).
Per realisar la Strategia per il traffic betg motorisà 2037 (Strategia TbM 2037) entaifer l'administraziun chantunala tschertgain nus per il 1. da zercladur 2026 u tenor cunvegna ina spezialista qualifitgada u in spezialist qualifitgà.
Voss champ d'incumbensas
- Realisar la strategia TbM 2037 (link)
- Promover e francar ina cultura da planisaziun che tegna quint dal TbM en il chantun Grischun
- Concepir ils process ed etablir in gremi directiv per realisar la strategia TbM
- Manar projects cardinals che sa refereschan a la strategia TbM 2037
- Coordinar las lavurs che sa refereschan a la strategia TbM 2037 entaifer l'Uffizi da construcziun bassa e cun auters uffizis chantunals ed accordar la strategia, ils instruments da planisaziun ed ils projects
- Elavurar rapports davart il stadi da realisaziun da la strategia TbM per mauns da las direcziuns d'uffizis pertutgads e per mauns da la politica
- Procurar per prestaziuns externas che gidan ad elavurar temas strategics en il TbM
- Preparar datas e basas per la communicaziun e per projects da pilot en il sectur dal TbM
Quai che nus giavischain da Vus
- Diplom da scola auta en planisaziun dal territori, planisaziun dal traffic, geografia u en ina disciplina cumparegliabla
- Furmaziun supplementara en il sectur dal traffic betg motorisà è d'avantatg
- Experientscha da plirs onns en la planisaziun strategica dal traffic u da la mobilitad, da preferenza cun referenza al traffic da peduns e da velos u a la mobilitad multimodala
- Experientscha directiva da projects cumplexs administrativs u directivs e da la collavuraziun interdisciplinara
- Fitg buna chapientscha da las structuras administrativas e dals instruments da planisaziun naziunals, chantunals e communals (en il cas ideal en il chantun Grischun u en in auter chantun svizzer / en ina vischnanca)
- Plaschair da lavurar en moda interdisciplinara cun ils pli differents acturs e da surpigliar la direcziun professiunala
- Excellentas abilitads da communitgar e da moderar, inschign diplomatic e sensori politic sco er forza da persvader
- Fitg buna expressiun a bucca ed en scrit en tudestg
- Enconuschientschas dal talian e/u dal rumantsch èn d'avantatg
Nus ans legrain da Vossa annunzia online e da far Vossa enconuschientscha.