Ensemen per il Grischun
L'unic chantun triling da la Svizra è in chantun multifar tant en quai che reguarda l'economia, la cultura sco er la politica. Cun 7106 km² è il Grischun il pli grond chantun da la Svizra e cun 150 valladas, 615 lais, 140 lieus da vacanzas e nundumbraivels dis da sulegl per onn porscha el in'auta qualitad da viver. L'administraziun chantunala dal Grischun è gist tuttina variada sco nossa cuntrada.
L'Uffizi da sanadad è in post da servetsch central dal Departament da giustia, segirezza e sanadad dal chantun Grischun. El exequescha ils relaschs dal dretg federal e chantunal e presta uschia ina contribuziun essenziala ad in provediment da la sanadad d'auta qualitad, segir ed orientà a l'avegnir en il chantun.
L'uffizi è dividì en ils suandants secturs spezials: permissiuns e surveglianza da las professiuns ed instituziuns da sanadad, servetsch da medi chantunal, controlla da medicaments e da narcotics, finanzas e controlling, promoziun da la sanadad e prevenziun sco er clom d'agid sanitar dal Grischun.
Il servetsch giuridic surpiglia ina rolla centrala en la surveglianza da persunas e da manaschis dal sectur da sanadad. El cusseglia e sustegna il post da servetsch sco er las partiziuns spezialas en tut las dumondas giuridicas, dat infurmaziuns giuridicas en connex cun il dretg da sanadad e coordinescha l'execuziun da l'obligaziun d'avair in'assicuranza da malsauns. Ultra da quai cooperescha il servetsch giuridic activamain a projects legislativs ed a revisiuns d'ordinaziuns ed è responsabel per elavurar disposiziuns e contracts da dretg administrativ.
Per rinforzar il servetsch giuridic da l'Uffizi da sanadad tschertgain nus per immediat u tenor cunvegna ina collavuratura giuridica u in collavuratur giuridic cun experientscha e cun enconuschientschas fundadas dal sistem giuridic svizzer.
Voss champ d'incumbensas
- Cooperar a revisiuns da leschas (tranter auter scriver sbozs da relaschs, realisar proceduras da consultaziun ed elavurar sbozs da missivas)
- Scriver disposiziuns da l'uffizi sco er cooperar a la preparaziun ed a la concepziun da disposiziuns dal departament e da conclus da la Regenza
- Rediger contracts da dretg administrativ
- Exequir proceduras administrativas e disciplinaras pertutgant il dretg da surveglianza, proceduras concernent la dispensaziun dal secret professiunal sco er proceduras da surpassaments, en spezial manar proceduras e scriver disposiziuns da la polizia sanitara
- Preparar posiziuns per mauns dal departament u da la Confederaziun
- Far scleriments giuridics en il sectur da sanadad e dar infurmaziuns ad autoritads, persunas privatas e.u.v.
Quai che nus giavischain da Vus
- Studi da giurisprudenza terminà (licenziat u MLaw)
- Experientscha professiunala d'intgins onns en l'administraziun publica, tar ina dretgira u en in'advocatura en Svizra
- Moda da lavurar independenta, structurada e precisa
- Buna expressiun e stil segir a bucca ed en scrit per tudestg sco er fitg bunas enconuschientschas d'ir enturn cun il computer
- Interess per andaments e connex politics
- Abilitad da lavurar en in team, flexibilitad e plaschair da la lavur multifara ed interdisciplinara
- En il cas ideal savais Vus pliras linguas chantunalas
Nus ans legrain da Vossa annunzia online e da far Vossa enconuschientscha.