ㅤ
Il Center da furmaziun per la sanadad ed ils fatgs socials (CSS) è in institut da dretg public dal chantun Grischun e responsabel per las scolaziuns e las furmaziuns supplementaras en il sectur da la sanadad e dals fatgs socials. Il spectrum da la scola cumpiglia furmaziuns professiunalas da basa sin il stgalim secundar II, inclusiv maturitad professiunala, scolaziuns e furmaziuns supplementaras, studis supplementars a diploms sin il stgalim terziar sco er curs, lavuratoris e seminaris per temas specifics. Per il svilup e per la cumplettaziun da studis e da direcziuns da studi en il sectur da sanadad gioga il CSS ina rolla centrala. Ultra da programs da furmaziun renconuschids porscha il CSS a las emprendistas ed als emprendists, a las studentas ed als students, a las participantas ed als participants da furmaziuns supplementaras sco er a var 90 collavuraturas e collavuraturs las meglras cundiziuns pussaivlas per lur scolaziun e furmaziun supplementara sco er per lur lavur.
Per il CSS tschertgain nus per il 1. da fanadur 2026 ina commembra u in commember per il cussegl da scola.
Voss champ d'incumbensas
- Sa basond sin la Lescha davart lieus da scolaziun en ils fatgs da la sanadad e socials (LLSS) vegnan il cussegl da scola e sia direcziun elegids da la Regenza. Per il 1. da fanadur 2026 u tenor cunvegna sto l'activitad en uffizi accessoric sco commembra u commember da l'organ da strategia vegnir occupada da nov.
Quai che nus giavischain da Vus
- Ina buna abilitad da communitgar, forza da persvader e l'abilitad da lavurar en moda flexibla, interdisciplinara ed orientada a process tutgan tar Vossas fermezzas per gidar a concepir process da midada en il cussegl da scola en moda precauta e cunvegnenta. Per rinforzar la dimensiun dal profil da l'entir cussegl da scola èn enconuschientschas dals fatgs da finanzas e da contabilitad fitg impurtantas.
- Vus avais enconuschientschas dal sectur spezial Sanadad e fatgs socials. Enconuschientschas da la cuntrada da la purschida da scolaziuns en il sectur da sanadad sin nivel professiunal e terziar sco er dals acturs ils pli impurtants en il chantun Grischun èn d'avantatg. Plinavant avais Vus la sensibilitad politica necessaria per temas da sanadad.
- La finala disponis Vus dal flair strategic e da l'abilitad da sviluppar vinavant cooperaziuns cun instituziuns entaifer ed ordaifer il chantun.
- Vus essas ina persunalitad engaschada che contribuescha decisivamain a la colliaziun da l'instituziun cun branschas sco er cun applitgadras ed applitgaders relevants per la regiun. Vus avais in stretg connex cun la pratica ed As engaschais fermamain per la scolaziun e per il svilup da las studentas e dals students da la scola. Bunas enconuschientschas da pliras linguas chantunalas cumpletteschan Voss profil.
Nus ans legrain da Vossa annunzia online e da far Vossa enconuschientscha.