Ensemen per il Grischun
L'unic chantun triling da la Svizra è in chantun multifar tant en quai che reguarda l'economia, la cultura sco er la politica. Cun 7106 km² è il Grischun il pli grond chantun da la Svizra e cun 150 valladas, 615 lais, 140 lieus da vacanzas e nundumbraivels dis da sulegl per onn porscha el in'auta qualitad da viver. L'administraziun chantunala dal Grischun è gist tuttina variada sco nossa cuntrada.
Sco partiziun da l'Uffizi da cultura è l'Archiv dal stadi dal Grischun responsabel per preservar e per manar vinavant la tradiziun istorica dal chantun. El procura che las archivalias voluminusas ch'èn fin 800 onns veglias, pon vegnir utilisadas per la perscrutaziun istorica e da la publicitad interessada. Ultra da quai stat l'Archiv dal stadi en il servetsch da la segirezza giuridica e cusseglia l'administraziun chantunala en dumondas da la gestiun da documents e dal management d'infurmaziuns. Il svilup d'in archiv da la cultura architectonica e la surpigliada planisada da l'archiv da la Viafier retica èn dus projects impurtants ch'èn actualmain en elavuraziun.
Perquai ch'il titular actual da la plazza va en pensiun, tschertgain nus per il 1. d'october 2026 u tenor cunvegna ina persunalitad communicativa, ch'è abla da manar l'Archiv dal stadi, sco center da servetschs a la clientella, vers l'avegnir.
Voss champ d'incumbensas
- Vus sviluppais vinavant l'Archiv dal stadi en reguard strategic sin basa da las prescripziuns legalas e sin fundament da la scienza d'archiv actuala, e manais in team engaschà e cumpetent da var 13 collavuraturas e collavuraturs.
- Vus procurais per las resursas architectonicas, persunalas e finanzialas che l'Archiv dal stadi dovra per ademplir sias incumbensas legalas.
- Vus represchentais l'Archiv dal stadi en l'administraziun chantunala, nua ch'el ademplescha ina incumbensa interdisciplinara, sco er envers ulteriuras gruppas d'interess.
- Vus survegliais ils archivs publics en il chantun (archivs communals e regiunals).
- Ensemen cun instituziuns relevantas da la perscrutaziun istorica sviluppais, promovais e sustegnais Vus projects d'impurtanza scientifica e culturala.
- Vus promovais l'intermediaziun da l'istorgia grischuna sco savida d'orientaziun en las instituziuns dal sectur da furmaziun ed en la publicitad.
Quai che nus giavischain da Vus
- Vus avais terminà in studi da scienzas culturalas u da giurisprudenza, da preferenza d'istorgia.
- Vus avais terminà in studi supplementar en scienzas d'archiv u avais rimnà experientschas praticas substanzialas en in archiv public pli grond.
- Vus avais enconuschientschas avanzadas dal mund digital.
- Vus savais sviluppar finamiras e concepts strategics sco er manar e realisar projects pretensius. Experientscha da direcziun è giavischada.
- Cun cumpetenza sociala sco er en moda persvadenta e motivanta represchentais Vus las pretensiuns professiunalas da l'archivaziun en ils conturns da l'administraziun chantunala ed envers ulteriuras gruppas en mira.
- En scrit ed a bucca communitgais Vus tenor ils basegns dals adressats, en moda segira e precisa.
- Enconuschientschas da l'istorgia dal Grischun èn giavischadas.
- Enconuschientschas da pliras linguas chantunalas èn d'avantatg.
Nus ans legrain da Vossa annunzia online e da far Vossa enconuschientscha.