Ensemen per il Grischun
L'unic chantun triling da la Svizra è in chantun multifar tant en quai che reguarda l'economia, la cultura sco er la politica. Cun 7106 km² è il Grischun il pli grond chantun da la Svizra e cun 150 valladas, 615 lais, 140 lieus da vacanzas e nundumbraivels dis da sulegl per onn porscha el in'auta qualitad da viver. L'administraziun chantunala dal Grischun è gist tuttina variada sco nossa cuntrada.
L'Uffizi per industria, mastergn e lavur (UCIML) occupa actualmain var 120 collavuraturas e collavuraturs en sis regiuns dal chantun Grischun. Ultra da l'intermediaziun publica da lavur (CIL) organisain nus mesiras dal martgà da lavur per persunas che tschertgan ina plazza e manain la Cassa chantunala da dischoccupaziun. Plinavant ademplin nus differentas incumbensas en il sectur dal martgà da lavur e da la segirezza a la lavur.
Per la partiziun Mesiras per il martgà da lavur en noss program d'engaschament «pro vision» a Cuira tschertgain nus per il 1. da schaner 2026 u tenor cunvegna ina cussegliadra spezialisada u in cussegliader spezialisà per l'integraziun en il mund da lavur (60–100 %).
Voss champ d'incumbensas
- Assistenza ed accumpagnament da persunas che tschertgan ina plazza sin lur via en l'emprim martgà da lavur
- Analisar las fermezzas e las deblezzas individualas da las participantas e dals participants per optimar lur schanzas sin il martgà da lavur
- Sustegnair las participantas ed ils participants ad elavurar ils documents d'annunzia e da preparar discurs da preschentaziun sco er da realisar trenaments per la procedura d'annunzia
- Accumpagnar nossas participantas e noss participants en connex cun il trenament da lavurs commerzialas e d'autras lavurs praticas
- Documentar ils progress da las participantas e dals participants en sistems interns e rapportar als posts assegnants (CIL, assicuranza d'invaliditad, servetschs socials)
- Tgirar in stretg contact cun ils posts assegnants
- Installar e tgirar raits cun interpresas regiunalas sco er cun acturs relevants dal martgà da lavur
Quai che nus giavischain da Vus
- Scolaziun professiunala terminada en il sectur commerzial, social u cun connex tar il martgà da lavur ubain la prontezza d'absolver ina furmaziun supplementara specifica
- Experientscha professiunala en la furmaziun da persunas creschidas, en la lavur cun persunas che tschertgan ina plazza u en il sectur da persunal è d'avantatg
- Gronda cumpetenza sociala e sensibilitad en il contact cun differentas gruppas en mira
- Moda da lavurar independenta e l'abilitad da supportar squitsch en situaziuns pretensiusas
- Abilitad da lavurar en in team e prontezza da collavurar en moda interdisciplinara
- Fitg bunas enconuschientschas dal tudestg sco er bunas enconuschientschas a bucca dal talian
- Fitg bunas enconuschientschas da la IT, en spezial d'utilisar Microsoft Office e software specifica dal martgà da lavur
- Prontezza da far servetschs en ina da nossas ulteriuras filialas a Cuira
Nus ans legrain da Vossa annunzia online e da far Vossa enconuschientscha.