Ensemen per il Grischun
L'unic chantun triling da la Svizra è in chantun multifar tant en quai che reguarda l'economia, la cultura sco er la politica. Cun 7106 km² è il Grischun il pli grond chantun da la Svizra e cun 150 valladas, 615 lais, 140 lieus da vacanzas e nundumbraivels dis da sulegl per onn porscha el in'auta qualitad da viver. L'administraziun chantunala dal Grischun è gist tuttina variada sco nossa cuntrada.
L'Uffizi da construcziun bassa è cumpetent per la projectaziun, per la construcziun, per il mantegniment e per la gestiun da las vias chantunalas sco er per la correcziun dals curs d'aua e per il traffic betg motorisà en il Grischun. Plinavant ans occupain nus dal mantegniment funcziunal da las vias naziunalas sin il territori chantunal. L'infrastructura da las vias chantunalas cumpiglia passa 1450 construcziuns artifizialas, tranter auter punts d'ina autezza considerabla da fin 90 meters e tunnels d'ina lunghezza da fin 3 kilometers. Las sfidas da la natira che resultan la stad e l'enviern en noss chantun da muntogna, rendan nossa lavur pretensiusa e multifara. Sco uffizi certifitgà cun «Friendly Work Space» ans stattan la sanadad e la cuntentientscha da nossas var 480 collavuraturas e collavuraturs tut spezialmain a cor. Per quest motiv ans engaschain nus per in management da sanadad sistematic en il manaschi (MSM).
Il sectur da l'inschigneria da l'ambient promova l'ulteriur svilup e la realisaziun da strategias da persistenza e da concepts per reducir il CO2 per l'Uffizi da construcziun bassa e per ses projects da construcziun tenor las disposiziuns chantunalas e naziunalas.
Per la partiziun Construcziuns artifizialas tschertgain nus per il 1. da schaner 2026 u tenor cunvegna ina inschignera u in inschigner sco referendaria u referendari per l'inschigneria da l'ambient.
Voss champ d'incumbensas
- Elavurar ed evaluar en moda independenta bilantschas ecologicas per projects da construcziun bassa (punts, vias e.u.v.)
- Porscher sustegn en connex cun l'observaziun da cundiziuns concernent l'ambient e cun prescripziuns legalas en ils fatgs da construcziun
- Manar projects ed incumbensas en la tematica da la persistenza
- Cooperar e porscher sustegn professiunal als teams da project interns en connex cun modas da construcziun che schanegian las resursas, cun la tscherna da material da construcziun sco er cun mesiras da reducziun da CO2
- Valitar la tscherna dal material general e dal material da construcziun areguard la cumpatibilitad ecologica e la durabilitad
Quai che nus giavischain da Vus
- Diplom d'ina scola auta u d'ina scola auta spezialisada en il sectur da l'inschigneria u da las scienzas natiralas (SPF, universitad, SAS)
- Bunas enconuschientschas da metodas da valitaziun dals effects e d'indicaturs da l'ambient
- Experientschas fundadas en ils secturs spezials management da persistenza, utilisaziun da las resursas ed economia circulara
- Experientscha en la branscha da construcziun ed enconuschientschas en il sectur da la construcziun bassa èn d'avantatg
- Abilitads concepziunalas, structuradas ed organisatoricas
Nus ans legrain da Vossa annunzia online e da far Vossa enconuschientscha.