Ensemen per il Grischun
L'unic chantun triling da la Svizra è in chantun multifar tant en quai che reguarda l'economia, la cultura sco er la politica. Cun 7106 km² è il Grischun il pli grond chantun da la Svizra e cun 150 valladas, 615 lais, 140 lieus da vacanzas e nundumbraivels dis da sulegl per onn porscha el in'auta qualitad da viver. L'administraziun chantunala dal Grischun è gist tuttina variada sco nossa cuntrada.
La Centrala dal clom d'agid sanitar 144 Grischun organisescha e coordinescha en il chantun Grischun il salvament da persunas che han gì in accident u ch'èn vegnidas malsaunas. Ella è ina partiziun da l'Uffizi da sanadad e sa chatta en las localitads da la Centrala d'alarm e d'acziuns da la Polizia chantunala dal Grischun a Cuira, nua ch'i vegnan prendids encunter ils numers d'urgenza 112, 117, 118 e 144.
Per la Centrala dal clom d'agid sanitar 144 tschertgain nus per il 1. d'october 2025 u tenor cunvegna ina disponenta u in disponent
Voss champ d'incumbensas
- Prender encunter cloms d'urgenza sur il numer 144
- Alarmar e coordinar ils meds da salvament sco er las furmaziuns spezialas (care teams, first responders, servetschs SOS, colonnas sveltas da sanitad) tenor ils concepts chantunals ed interns
- Instruir persunas che telefoneschan, en connex cun mesiras d'emprim agid
- Documentar e survegliar las mesiras prendidas
- Intermediar medias e medis da servetsch, dentistas e da dentists d'urgenza, medias e medis dals egls d'urgenza sco er apotecas che han servetsch d'urgenza
- Barattar infurmaziuns relevantas per l'acziun cun partenaris participads entaifer ed ordaifer la centrala d'alarm
- Manar l'emprima fasa da las acziuns en situaziuns spezialas ed extraordinarias
- Lavurar en il servetsch da di, da notg e da fin d'emna (365 dis / 24 uras), far servetsch da pichet
- Cooperar en gruppas da lavur, liquidar incumbensas administrativas accessoricas
Quai giavischain nus da Vus
- Fitg bun senn da responsabladad; gronda cumpetenza sociala
- Abilitad da sa procurar svelt la survista en situaziuns cumplexas, da mantegnair la survista e da coordinar process che han lieu a medem temp
- Abilitad da supportar squitsch psichic, da prender decisiuns en situaziuns excepziunalas sco er d'agir en moda structurada e professiunala e cun cleras finamiras
- Affinitad per l'informatica, cumpetenza da duvrar en moda segira sistems e meds da communicaziun tecnicamain pretensius
- Diplom da sanitaria u sanitari da salvament SSS, da tgirunza u tgirunz SSS ubain da sanitaria u sanitari d'ambulanza CP u MPA sco er almain 6 onns experientscha professiunala respectiva
- Fitg bunas enconuschientschas dal tudestg; enconuschientschas a bucca dal talian e/u da l'englais
- Persuna cooperativa, communicativa e dinamica
- Prontezza d'absolver entaifer 4 onns l'examen professiunal da Disponenta/disponent Centrala d'alarm CP
Nus ans legrain da Vossa annunzia online e da far Vossa enconuschientscha.