Ensemen per il Grischun
L'unic chantun triling da la Svizra è in chantun multifar en quai che reguarda l'economia, la cultura sco er la politica. Cun 7106 km² è il Grischun il pli grond chantun da la Svizra e cun 150 valladas, 615 lais, 140 lieus da vacanzas e nundumbraivels dis da sulegl per onn porscha el in'auta qualitad da viver. L'administraziun chantunala dal Grischun è gist uschè variada sco nossa cuntrada. Contribuescha tias abilitads singularas e concepescha ensemen cun nus l'avegnir da l'administraziun chantunala dal Grischun.
Gida a concepir noss spazi da viver
En l'Uffizi per il svilup dal territori (UST) collavuran 35 collegas engaschadas ed engaschads per ina finamira: il diever responsabel e prospectiv da noss terren pretensius. Tar nus ta spetga in team motivà ed in champ d'incumbensas multifar.
Noss focus è la cumbinaziun d'ina utilisaziun effizienta dal spazi, da la protecziun da resursas natiralas e d'in niz durabel per l'economia publica. En quest connex accordain nus differents interess en il spazi alpin, sin autezzas da 253 m fin sur 4000 m s.m. e quai fair, transparent e cun in sguard sin l'entir.
Sfundra cun nus en las sfidas dal svilup territorial rural e daventa part d'ina incumbensa impurtanta.
Tenor cunvegna purschain nus a tai in praticum en la planisaziun dal territori:
Invistas praticas per tia entrada en la planisaziun dal territori
Sco praticanta u praticant daventas ti part da noss team en la partiziun Planisaziun d'utilisaziun ed edifizis ordaifer la zona da construcziun. Ti survegns ina invista pratica en las incumbensas multifaras da la planisaziun dal territori e ti ramassas experientschas preziusas per tia futura vita professiunala.
Ti elavuras dumonda da construcziun ordaifer la zona da construcziun, sustegnas tar l'examinaziun preliminara e l'approvaziun da planisaziuns localas communalas e valiteschas projects ord la perspectiva da la planisaziun dal territori. Ultra da quai surpiglias ti en tscherts puncts substituziuns e ta famigliariseschas uschia pass per pass cun quest sectur spezial interessant.
Tes profil
Questa plazza da praticum sa drizza a studentas e students da scolas autas spezialisadas e da scolas autas che vulan ramassar experientschas praticas. Er absolventas ed absolvents da studis da la planisaziun dal territori u studis parents che vulan sa preparar per l'entrada en il mund da lavur u per ina furmaziun supplementara en il sectur da la planisaziun dal territori èn bainvegnids cordialmain. In vair interess per dumondas concretas da la planisaziun dal territori vegn premess.
Plinavant èsi impurtant d'avair in bun stil en scrit en la lingua tudestga sco er – en il cas ideal – enconuschientschas d'ina ulteriura lingua uffiziala chantunala (talian u rumantsch). Ti lavuras gugent en il team, has ina buna moda da communitgar e mussas iniziativa. In'utilisaziun segira dals meds d'informatica moderns cumpletteschan tes profil.
Nus ans legrain da tia annunzia online e d'emprender d'enconuscher tai.