Ensemen per il Grischun
L'unic chantun triling da la Svizra è in chantun multifar tant en quai che reguarda l'economia, la cultura sco er la politica. Cun 7106 km² è il Grischun il pli grond chantun da la Svizra e cun 150 valladas, 615 lais, 140 lieus da vacanzas e nundumbraivels dis da sulegl per onn porscha el in'auta qualitad da viver. L'administraziun chantunala dal Grischun è gist tuttina variada sco nossa cuntrada.
La Polizia criminala scuvra delicts, eruescha las delinquentas ed ils delinquents e surdat quels a la giustia penala. Ella segirescha cumprovas als lieus dal delict, interroghescha perditgas e persunas suspectadas e fa expertisas da la tecnica criminala. Per sclerir delicts dovri adina retschertgas perseverantas, scleriments fundads e lavurs da detagl da lunga durada. Nus investigain tant en il spazi analog sco er virtual e collavurain stretgamain cun autoritads partenarias (inter)naziunalas. La lavur preventiva per impedir malfatgs cun porscher infurmaziuns e cussegliaziun davart dumondas da segirezza, è medemamain ina part impurtanta da la Polizia criminala.
Tar la Polizia criminala dal Grischun lavuran passa 100 criminalistas e criminalists da differents secturs spezials vi da questa incumbensa pretensiusa. Nus ans orientain latiers en spezial er a la strategia Kapo GR 2025+. La lavur tar la Polizia criminala è fitg pretensiusa. Per sclerir delicts da mazzament, per il commerzi cun drogas, il commerzi cun umans, delicts sexuals, enguladitschs cun infracziun, delicts economics, la lavur da prevenziun e.u.v. è la lavur da team indispensabla.
Tenor cunvegna tschertgain nus ina persunalitad directiva engaschada e versada sco Scheffa u schef da la Polizia criminala.
Voss champ d'incumbensas
- Surpigliar la direcziun da la partiziun Polizia criminala
- Surpigliar la responsabladad per la direcziun persunala e professiunala da la Polizia criminala cun ses differents secturs spezials
- Surpigliar la responsabladad per tut las retschertgas strategicas ed operativas da la Polizia criminala en il chantun
- Sviluppar, planisar e diriger il cumbat cunter la criminalitad e fixar puncts centrals
- Tgirar ina stretga collavuraziun cun la procura publica e cun ulteriuras autoritads chantunalas, interchantunalas e naziunalas sco er cun partenaris da segirezza
- Sviluppar vinavant l'organisaziun areguard la structura, ils process e la scolaziun
- Esser commembra u commember sco er cooperar en la direcziun
- Prestar servetsch regular sco uffiziera u uffizier da pichet
Quai che nus giavischain da Vus
- In studi universitar terminà, da preferenza en giurisprudenza u en scienzas da manaschi, criminalistica ubain studis cumparegliabels
- En il cas ideal experientscha sco uffiziera u uffizier da polizia u savida spezialisada fundada da la polizia criminala sco er fitg bunas enconuschientschas praticas dal dretg da polizia, dal dretg penal e dal dretg da procedura penala
- Persunalitad innovativa cun in pensar cumplessiv e cun fermezzas strategicas, concepziunalas e communicativas
- Stil da manar motivant ed orientà al team, demananza segira e capacitad da persvader
- Interess per ils aspects da l'economia da manaschi da la lavur directiva sco er per il svilup da cumpetenzas e da resursas organisatoricas e metodicas
- Abilitads analiticas excellentas e cumpetenzas da schliar problems
- Gronda cumpetenza sociala, flexibilitad ed ina gronda abilitad da supportar squitsch
- Moda da lavurar structurada e l'abilitad da communitgar en moda confurma al stgalim
- La naziunalitad svizra è ina premissa fundamentala
Nus ans legrain da Vossa annunzia online e da far Vossa enconuschientscha.