Ensemen per il Grischun
Sco chantun triling porscha il Grischun ina gronda diversitad areguard l'economia, la cultura e la politica. A medem temp è el ina regiun per lavurar e per far vacanzas. Cun sias purschidas turisticas multifaras e cun sia cuntrada magnifica porscha el in'auta qualitad da viver. L'administraziun chantunala dal Grischun è gist uschè variada sco noss chantun. Concepi cun nus il futur e faschai valair Vossas abilitads singularas.
Tar l'Uffizi per il svilup dal territori (UST) s'engaschan 35 collavuraturas e collavuraturs per l'utilisaziun progressiva da la resursa stgarsa terren. En noss team motivà As spetga in champ d'incumbensas multifar. Nossa incumbensa principala è quella, da chattar la ballantscha tranter in'utilisaziun effizienta dal territori, la protecziun da las resursas natiralas ed il niz per l'economia publica a lunga vista. En quest connex coordinain nus las pretensiuns multifaras envers il spazi da viver alpin e procurain per ina consideraziun transparenta dals interess.
Per rinforzar noss team tar il UST tschertgain nus tenor cunvegna ina planisadra cirquitala u in planisader cirquital (70–90 %).
Voss champ d'incumbensas
Voss champ d'incumbensas è integrà en in team da circa ina dunsaina collavuraturas e collavuraturs en la partiziun «Planisaziun d'utilisaziun e construcziun ordaifer las zonas da construcziun». Vus cussegliais vischnancas e lur biros da planisaziun en dumondas dal svilup territorial, da la planisaziun d'utilisaziun e dal construir ordaifer las zonas da construcziun (EOZ) – qua essas Vus l'emprima persuna da contact. Voss portfolio d'incumbensas cumpiglia l'examinaziun da planisaziuns d'utilisaziun communalas e l'elavuraziun da conclus correspundents per mauns da l'autoritad d'approvaziun. Ultra da quai giuditgais Vus dumondas EOZ, redigis permissiuns EOZ e prendais posiziun davart projects relevants per il territori. La finala accumpagnais Vus singuls process d'impurtanza territoriala speziala sin plaun communal.
Quai che nus giavischain da Vus
- Vus avais terminà in studi ad ina scola auta u ad ina scola auta spezialisada (da preferenza sco planisadra u planisader dal territori ubain sco architecta u architect) ed avais, en il cas ideal, intgins onns experientscha professiunala.
- Vus avais ina fitg buna expressiun en scrit ed a bucca.
- Abilitad da lavurar en in team, atgna iniziativa, plaschair da contact, avertadad ed abilitad da supportar squitsch sco er ina moda da lavurar ch'è orientada a la clientella ed a soluziuns cumpletteschan Voss profil.
- Bunas enconuschientschas dal chantun Grischun èn giavischadas gist uschia sco experientschas u enconuschientschas da l'urbanistica e da l'architectura.
- Sche las qualificaziuns èn equivalentas, vegnan preferids las candidatas ed ils candidats cun enconuschientschas dal talian a bucca ed en scrit.
Nus ans legrain da Vossa annunzia online e da far Vossa enconuschientscha.