Ensemen per il Grischun
L'unic chantun triling da la Svizra è in chantun multifar tant en quai che reguarda l'economia sco er la cultura e la politica. Cun 7106 km² è il Grischun il pli grond chantun da la Svizra e cun 150 valladas, 615 lais, 140 lieus da vacanzas e nundumbraivels dis da sulegl per onn porscha el in'auta qualitad da viver. L'administraziun chantunala dal Grischun è gist uschè variada sco nossa cuntrada. Contribuescha tias abilitads singularas e concepescha ensemen cun nus l'avegnir da l'administraziun chantunala dal Grischun.
La Protecziun civila dal Grischun è – areguard sia organisaziun – unica en Svizra. Sco furmaziun organisada sin plaun chantunal profita ella da sinergias en l'instrucziun ed en las intervenziuns. A sias collavuraturas ed a ses collavuraturs porscha ella in ambient da lavur fitg varià.
L'Uffizi da militar e da protecziun civila tschertga per il 1. da matg 2025 ina instructura u in instructur da protecziun civila cun responsabladad per secturs spezials.
Tes champ d'incumbensas
- Cun tia experientscha professiunala cumprovada cumpletteschas ti noss team giuven e motivà d'instructuras ed instructurs.
- Sco persuna directiva surpiglias ti ina rolla centrala en l'instrucziun da las persunas obligadas da far servetsch da protecziun civila, e quai en tut ils secturs spezials, davent dal stgalim da la squadra fin al cader.
- Ti participeschas activamain a projects currents per il svilup da documents d'instrucziun moderns e digitals e gidas a reorganisar il model d'instrucziun.
- Sco instructura u instructur ta spetga a partir da l'onn 2027 in center d'instrucziun resch nov cun in indriz d'instrucziun topmodern. Sco cumandanta u cumandant da tia atgna cumpagnia da protecziun civila prestas ti plinavant adina puspè servetschs externs en il chantun Grischun.
- En cas d'eveniments pon nossas cumpagnias da milissa far quint cun las experientschas che ti has fatg a chaschun da crisas e cun tias qualitads directivas.
- Tut tenor tes interess persunal e tia qualificaziun pos ti surpigliar ulteriuras incumbensas directivas. Quai èn tranter auter la responsabladad per il material d'intervenziun e per la logistica, per il sectur spezial «lavurs da pionier e salvament en profunditads» sco er la funcziun da l'incumbensada u da l'incumbensà per la segirezza da manaschi. Uschia ta purschain nus bleras perspectivas e pussaivladads da svilup.
Quai giavischain nus da tai
- En il cas ideal has ti terminà ina scolaziun d'instructura u instructur ubain da cumandanta u cumandant u disponas d'in diplom professiunal equivalent. Plinavant es ti ina persuna motivada e versada per l'instrucziun e per la cussegliaziun da las appartegnentas e dals appartegnents da la Protecziun civila dal Grischun.
- Ti has plaschair d'instruir la cumpagnia che ta vegn confidada, da manar quella en las intervenziuns e da parter tia experientscha cun noss giuven team d'instructuras ed instructurs.
- Avertadad per novaziuns e plaschair da lavurar cun meds digitals ta qualifitgeschan per questas incumbensas.
- Ti has experientscha da manar persunas en la protecziun civila, en il militar, tar ils pumpiers u tar la polizia ed enconuschas ils secturs logistica d'intervenziun e material.
- Enconuschientschas dal rumantsch u dal talian èn d'avantatg.
- Prontezza a l'acziun, flexibilitad, fidadadad ed abilitad da lavurar en in team tutgan tar tias qualificaziuns e fan, che ti es la persuna ideala per questa plazza interessanta.
Nus ans legrain da tia annunzia online e d'emprender d'enconuscher tai.