Ensemen per il Grischun
L'unic chantun triling da la Svizra è in chantun multifar tant en quai che reguarda l'economia, la cultura sco er la politica. Cun 7106 km² è il Grischun il pli grond chantun da la Svizra e cun 150 valladas, 615 lais, 140 lieus da vacanzas e nundumbraivels dis da sulegl per onn porscha el in'auta qualitad da viver. L'administraziun chantunala dal Grischun è gist tuttina variada sco nossa cuntrada.
L'Uffizi per la furmaziun professiunala (UCFP) è in post da servetsch dal Departament d'educaziun, cultura e protecziun da l'ambient (DECA) e realisescha las incumbensas da la politica da furmaziun da la Confederaziun e dals chantuns concernent la furmaziun professiunala da basa. Plinavant è el il post da cumpetenza en dumondas da la tscherna da professiun, da scola e da studi sco er l'instanza che accumpogna durant l'entira carriera professiunala.
La partiziun Cussegliaziun da professiun, da studi e da carriera (CPSC) cusseglia ed infurmescha persunalmain, independentamain e gratuitamain giuvenils e persunas creschidas en dumondas concernent la professiun, il studi e la carriera. La CPSC sustegna en la tscherna da professiun, da studi u en la concepziun da la carriera ed accumpogna en la planisaziun da l'avegnir professiunal.
Per l'Uffizi per la furmaziun professiunala tschertgain nus per il 1. da fanadur 2025 u tenor cunvegna ina cussegliadra u in cussegliader da professiun, da studi e da carriera (60–80 %).
Voss champ d'incumbensas
- Cussegliar ed infurmar giuvenils e persunas creschidas en connex cun la tscherna da professiun, da scola e da studi sco er cun la concepziun da la carriera professiunala
- Gidar las persunas che tschertgan cussegl a trair a niz las atgnas resursas, ad agir ed a decider en atgna responsabladad
- Tgirar la collavuraziun cun las persunas d'instrucziun dals stgalims secundars I e II, sco scolas dal stgalim superiur e scolas professiunalas spezialisadas, per la preparaziun da la tscherna da professiun e per la concepziun da la carriera
- Realisar occurrenzas d'infurmaziun per geniturs e per classas
- Tgirar contacts regulars cun scolas, cun instituziuns da furmaziun, cun posts spezialisads e cun l'economia
- Collavurar en projects ed en gruppas da lavur internas
Quai che nus giavischain da Vus
- Ina scolaziun renconuschida sin plaun federal sco cussegliadra u cussegliader da professiun, da studi e da carriera u la prontezza d'absolver la scolaziun
- Demananza cumpetenta e persvadenta davant giuvenils e persunas creschidas, geniturs e persunas d'instrucziun
- Da preferenza enconuschientscha da las structuras economicas regiunalas sco er dal martgà da lavur
- Colliaziun cun ils posts spezialisads regiunals
- Persunalitad engaschada, orientada a soluziuns ed abla da supportar squitsch cun fitg bunas abilitads communicativas
- Bunas enconuschientschas a bucca ed en scrit dal tudestg
- Bunas enconuschientschas dal rumantsch ed enconuschientschas da basa dal talian
- Flexibilitad ed in bun senn d'organisaziun, plinavant gronda atgna responsabladad
Nus ans legrain da Vossa annunzia online e da far Vossa enconuschientscha.