Ensemen per il Grischun
L'unic chantun triling da la Svizra è in chantun multifar tant en quai che reguarda l'economia, la cultura sco er la politica. Cun 7106 km² è il Grischun il pli grond chantun da la Svizra e cun 150 valladas, 615 lais, 140 lieus da vacanzas e nundumbraivels dis da sulegl per onn porscha el in'auta qualitad da viver. L'administraziun chantunala dal Grischun è gist tuttina variada sco nossa cuntrada.
Tar l'Uffizi per il svilup dal territori (UST) s'engaschan 35 collavuraturas e collavuraturs per l'utilisaziun progressiva da la resursa stgarsa terren. En noss team motivà As spetga in champ d'incumbensas multifar. Nossa incumbensa principala è quella, da chattar la ballantscha tranter in'utilisaziun effizienta dal territori, la protecziun da las resursas natiralas ed il niz per l'economia publica a lunga vista. En quest connex coordinain nus las pretensiuns multifaras envers il spazi da viver alpin e procurain per ina consideraziun transparenta dals interess.
Il team «Planisaziun directiva e basas» cun quatter collavuraturas e collavuraturs tschertga tenor cunvegna ina planisadra u in planisader dal territori.
Voss champ d'incumbensas
- Vus manais proceduras da la planisaziun directiva chantunala e regiunala e faschais valair en questas planisaziuns ils interess d'in svilup dal territori orientà al futur.
- Vus elavurais rapports da controlla e propostas da decisiun per l'approvaziun tras la Regenza.
- En cas da dumondas pertutgant la planisaziun directiva essas Vus l'emprima persuna da contact per las regiuns, per ils biros da planisaziun, per ils posts spezialisads dal chantun e da la Confederaziun sco er per ulteriuras persunas pertutgadas.
- Vus tgirais projects che han consequenzas considerablas per il territori e per l'ambient, quai en ils secturs abitadi, cuntrada, turissem, energia e traffic.
- Vus accumpagnais projects da svilup dal territori cun differentas gruppas d'interess e surpigliais la responsabladad professiunala per dossiers entaifer il team.
Quai che nus giavischain da Vus
- Vus avais terminà in studi da basa ad ina scola auta u ad ina scola auta spezialisada en il sectur dal svilup dal territori, dal svilup regiunal u da geografia ubain en ina direcziun sumeglianta.
- Vus essas ina persunalitad flexibla ch'è abla da lavurar en in team e da supportar squitsch. Vus lavurais en moda independenta ed orientada a soluziuns.
- Vossa savida dal management da projects e Vossas bunas abilitads communicativas en tudestg As permettan da realisar projects cun differentas gruppas d'interess.
- Grazia a Voss bun dun receptiv chapis Vus svelt fatgs cumplexs e savais far valair ils interess dal svilup dal territori tenor ils basegns da las adressatas e dals adressats.
- Enconuschientschas d'ina segunda lingua chantunala èn d'avantatg.
Nus ans legrain da Vossa annunzia online e da far Vossa enconuschientscha.