Ensemen per il Grischun
L'unic chantun triling da la Svizra è in chantun multifar tant en quai che reguarda l'economia, la cultura sco er la politica. Cun 7106 km² è il Grischun il pli grond chantun da la Svizra e cun 150 valladas, 615 lais, 140 lieus da vacanzas e nundumbraivels dis da sulegl per onn porscha el in'auta qualitad da viver. L'administraziun chantunala dal Grischun è gist tuttina variada sco nossa cuntrada.
L'Uffizi per la furmaziun professiunala (UCFP) è in post da servetsch dal Departament d'educaziun, cultura e protecziun da l'ambient (DECA) e realisescha las incumbensas da la politica da furmaziun da la Confederaziun e dal chantun concernent la furmaziun professiunala da basa. Plinavant è el il post da cumpetenza en dumondas da la tscherna da professiun, da scola e da studi sco er l'instanza che accumpogna durant l'entira carriera professiunala.
La partiziun Surveglianza da la furmaziun professiunala cusseglia emprendistas ed emprendists e manaschis d'emprendissadi sco er ulteriuras persunas participadas sco las persunas responsablas per l'educaziun, las scolas professiunalas spezialisadas, ils curs ordaifer il manaschi, las federaziuns professiunalas sco er expertas ed experts d'examen ed è il post da consultaziun en connex cun dumondas davart la relaziun d'emprendissadi. Ultra da quai intermediescha la Surveglianza da la furmaziun professiunala cuntegns da la furmaziun tar curs per furmaturas e furmaturs professiunals, ha la surveglianza da la furmaziun en il manaschi en il rom da la legislaziun davart la furmaziun professiunala, prepara posiziuns/decisiuns per mauns da las manadras e dals manaders dals posts da servetsch ed è responsabla per la gestiun da las applicaziuns (d'internet) ch'èn specificas per la furmaziun professiunala.
Per l'Uffizi per la furmaziun professiunala tschertgain nus per il 1. mars 2025 u tenor cunvegna ina inspectura professiunala u in inspectur professiunal cun gronda affinitad per la IT (60 %).
Voss champ d'incumbensas
- Exequir la surveglianza da las professiuns/regiuns attribuidas a Vus (spezialmain la furmaziun da basa en scola) tenor la legislaziun federala e chantunala
- Sclerir las premissas per conceder las permissiuns da furmaziun als manaschis da las professiuns attribuidas ad els ed approvar sco er elavurar ils contracts d'emprendissadi resp. da praticum
- Dar infurmaziuns sco er cussegliar emprendistas ed emprendists, persunas responsablas per l'educaziun sco er manaschis en connex cun dumondas davart la furmaziun professiunala da basa
- Cussegliar persunas creschidas areguard la procedura da qualificaziun sco er preparar las decisiuns respectivas
- Cooperar sco referenta u referent a curs per furmaturas e furmaturs professiunals ed ad occurrenzas
- Preparar posiziuns/decisiuns che concernan la furmaziun professiunala da basa
- Surpigliar la responsabladad per las applicaziuns che servan ad examinar, a tgirar ed a sviluppar vinavant las applicaziuns (d'internet) ch'èn specificas per la furmaziun professiunala
Quai che nus giavischain da Vus
- Ina furmaziun professiunala da basa terminada cun success cun ina scolaziun cuntinuanta (p.ex. examen professiunal superiur u scolaziun equivalenta)
- Experientscha sco furmatura professiunala u furmatur professiunal ubain sco experta u expert d'examen
- Qualificaziun per dar curs a persunas creschidas u la prontezza d'obtegnair quella cun agid d'ina furmaziun supplementara
- Enconuschientschas fundadas dal sistem da furmaziun svizzer, spezialmain da la furmaziun professiunala da basa, inclusiv dals relaschs giuridics e lur applicaziun
- Fitg bunas enconuschientschas da l'informatica ed ina gronda affinitad per la IT
- Persunalitad engaschada che sa s'integrar en in team, ch'è orientada a soluziuns ed abla da supportar squitsch cun fitg bunas abilitads communicativas
- Demananza cumpetenta e persvadenta
- Moda da lavurar effizienta, independenta, flexibla e cun atgna responsabladad
- Fitg bunas enconuschientschas a bucca ed en scrit dal tudestg
- Enconuschientschas d'ina segunda, eventualmain er da la terza lingua chantunala èn bainvegnidas
Nus ans legrain da Vossa annunzia online e da far Vossa enconuschientscha.