Praticanta u praticant per il sectur Biodiversitad e qualitad da la cuntrada en l'agricultura

Uffizi d'agricultura e da geoinfurmaziun | 50–100 % | Cuira

Ensemen per il Grischun
L'unic chantun triling da la Svizra è in chantun multifar tant en quai che reguarda l'economia, la cultura sco er la politica. Cun 7106 km² è il Grischun il pli grond chantun da la Svizra e cun 150 valladas, 615 lais, 140 lieus da vacanzas e nundumbraivels dis da sulegl per onn porscha el in'auta qualitad da viver. L'administraziun chantunala dal Grischun è gist tuttina variada sco nossa cuntrada.
L'Uffizi d'agricultura e da geoinfurmaziun è in post da servetsch dal Departament d'economia publica e fatgs socials. El cumpiglia quatter partiziuns: Mesiras agriculas, Meglieraziuns da structura, Mesiraziun e Center da cumpetenza dal SIG. 

La partiziun Mesiras agriculas è cumpetenta per exequir la legislaziun relevanta per l'agricultura che sa basa sin la politica agrara da la Confederaziun. Latiers tutgan principalmain ils pajaments directs a l'agricultura. 
En quest connex elavura il ressort Surfatschas/ecologia las basas da las surfatschas ed è responsabel per ils geners da pajaments directs per la biodiversitad e per la qualitad da la cuntrada. En il rom da quest praticum sustegnais Vus las collavuraturas ed ils collavuraturs en lur lavurs quotidianas, surpigliais tenor basegn dentant er ulteriuras incumbensas en la partiziun Mesiras agriculas.

Nus As purschain ina invista en la lavur variada e da gronda responsabladad en l'administraziun chantunala. Vus lavurais en in team cumpetent e motivà ed inscuntrais ina cultura d'interpresa positiva ed orientada als servetschs ed a las finamiras cun curtas vias da decisiun.

Nus tschertgain per il ressort Surfatschas/ecologia en la partiziun Mesiras agriculas per immediat ina praticanta motivada u in praticant motivà (50–100 %) per 3 fin 6 mais en ils secturs Biodiversitad e Qualitad da la cuntrada.

Voss champ d'incumbensas

  • Sustegnair en las lavurs quotidianas dal ressort sco l'elavuraziun da mesiras da colliaziun e mesiras da la qualitad da la cuntrada en agriSIG 
  • Elavurar manuals ed instrucziuns curtas
  • Far differentas lavurs da digitalisaziun en agriSIG ed en ArcSIG
  • Collavurar ulteriuramain tar l'execuziun dals pajaments directs, en cas da basegn er en auters ressorts da la partiziun Mesiras agriculas

Quai che nus giavischain da Vus

  • Praticum en il rom d'in studi da scola auta en agronomia, biologia, scienzas da l'ambient e da l'ecologia u geografia
  • Interess per ils secturs tematics biodiversitad, colliaziun, qualitad da la cuntrada e SIG
  • Independenza, exactadad, atgna iniziativa e talent organisatoric 
  • Abilitads excellentas da collavurar en in team e da communitgar
  • Expressiun segira en tudestg a bucca ed en scrit, enconuschientschas d'autras linguas chantunalas èn d'avantatg

Noss avantatgs

Models dal temp da lavur flexibels e nua che pussaivel incl. homeoffice e lavur mobila
Work-life-balance cun vacanzas d'almain 5 emnas e cun congedi d'anzianitad
Supplement social spezial ultra dal supplement per uffants e sustegn per la tgira d'uffants tras terzas persunas
Paja e prestaziuns socialas attractivas
Pussaivladads multifaras d'absolver ina scolaziun ed ina furmaziun supplementara
Pussaivladad da gidar a concepir il futur dal chantun

Lieu da lavur

Uffizi d'agricultura e da geoinfurmaziun
Ringstrasse 10
7001 Cuira

Per dumondas davart la professiun stat Matthias Engesser, manader Surfatschas/ecologia, gugent a Vossa disposiziun sut il numer da telefon 081 257 23 99.

Termin d'annunzia: 
24 da zercladur 2024

Nus ans legrain da Vossa annunzia online e da far Vossa enconuschientscha.