Ensemen per il Grischun
L'unic chantun triling da la Svizra è in chantun multifar tant en quai che reguarda l'economia, la cultura sco er la politica. Cun 7106 km² è il Grischun il pli grond chantun da la Svizra e cun 150 valladas, 615 lais, 140 lieus da vacanzas e nundumbraivels dis da sulegl per onn porscha el in'auta qualitad da viver. L'administraziun chantunala dal Grischun è gist tuttina variada sco nossa cuntrada.
Il Departament d'infrastructura, energia e mobilitad (DIEM) cumpiglia ils secturs
energia, forza idraulica, privels da la natira, traffic public, construcziun auta e bassa, acquisiziuns, guaud sco er chatscha, animals da rapina gronds e pestga. El è dividì en tschintg uffizis sco er en il Secretariat dal departament che porscha – sco organ da stab central – in vast sustegn a la scheffa dal departament tar la direcziun specifica e politica dal departament. Il Secretariat dal departament furnescha ses servetschs en il nov center administrativ «sinergia» en in ambient da lavur modern, avert e digital, directamain sper la staziun Cuira Vest.
Nus tschertgain per il 1. da settember 2024 u tenor cunvegna ina secretaria u in secretari per il Secretariat dal DIEM.
Voss champ d'incumbensas
- Liquidar la correspundenza e lavurs administrativas per la secretaria generala u il secretari general sco er per las collavuraturas ed ils collavuraturs giuridics
- Sustegnair las collavuraturas ed ils collavuraturs da secretariat dal departament en connex cun liquidar fatschentas generalas dal departament
- Emetter dumondas, rapports e posiziuns sco er missivas, intervenziuns parlamentaras, disposiziuns e relaschs giuridics
- Manar l'agenda, preparar sesidas e planisar termins per las collavuraturas ed ils collavuraturs giuridics dal secretariat
- Procurar per il servetsch da telefon en il secretariat
- Liquidar la posta che entra sco er la spediziun da la posta
- Tgirar la biblioteca e l'archivaziun da la litteratura spezialisada
- Surpigliar autras incumbensas tenor las lavurs che resultan
Quai che nus giavischain da Vus
- Scolaziun commerziala terminada sco er experientscha professiunala da plirs onns
- Moda da lavurar structurada, prospectiva, independenta e precisa
- Persunalitad orientada als servetschs ed a soluziuns
- Abilitad da lavurar en in team, prontezza a l'acziun ed atgna iniziativa
- Discreziun
- Applicaziun segira da Microsoft Office
- Expressiun segira en tudestg a bucca ed en scrit, enconuschientschas d'ina ulteriura lingua chantunala èn giavischadas
Nus ans legrain da Vossa annunzia online e da far Vossa enconuschientscha.