L'administraziun chantunala – ina patruna moderna per collavuraturas motivadas e collavuraturs motivads sco Vus.
collavuratura giuridica u collavuratur giuridic per la Chanzlia chantunala (60–80 %)
Chanzlia chantunala dal Grischun
Reichsgasse 35
7001 Cuira
La Chanzlia chantunala è il post general da stab, da coordinaziun e da colliaziun dal Cussegl grond e da la Regenza. Ella è ina purschidra da servetschs multifara per l'administraziun chantunala e per la publicitad e procura che las burgaisas ed ils burgais pon far diever da lur dretgs politics. Nus As purschain in champ d'incumbensas captivant e varià. Ina introducziun accurata, in ambient da lavur avert e modern en in pitschen team amez la citad veglia da Cuira, uras da lavur flexiblas, la pussaivladad da lavurar per part davent da chasa sco er purschidas da perfecziunament attractivas As spetgan.
Voss champ d'incumbensas: En questa funcziun avais Vus la cunresponsabladad per il sectur Dretgs politics e publicaziuns (incl. organisaziun da votaziuns e d'elecziuns) sco er la garanzia da qualitad da tut la legislaziun chantunala. Ultra da quai essas Vus responsabla u responsabel per l'elavuraziun da projects da lescha, da missivas, da consultaziuns e da rapports en il champ da cumpetenza da la Chanzlia chantunala. Vus elavurais dumondas giuridicas per incumbensa da la Regenza u da la direcziun da la Chanzlia chantunala. En il rom da Voss champ d'incumbensas cooperais Vus er a projects interns ed interdepartamentals.
Voss profil: Questa activitad pretensiusa e variada pretenda in diplom universitar en giurisprudenza. Vus avais experientscha professiunala da plirs onns en il champ giuridic, en il cas ideal en il dretg public ed administrativ. Vus essas ina persunalitad iniziativa e fidada che lavura en moda precisa e cun interess per prestaziuns da servetsch. Vus savais lavurar en moda independenta ed avais ina gronda responsabladad persunala. Vus avais plaschair da sustegnair e da cussegliar en moda cumpetenta e nuncumplitgada las gruppas en mira internas ed externas. In dun organisatoric, abilitad da supportar squitsch, integritad sco er in'expressiun segira a bucca ed en scrit per tudestg cumpletteschan Voss profil. D'avantatg èn enconuschientschas da las linguas chantunalas e da las relaziuns politicas.
Grad d'occupaziun: 60–80 %
Cumenzament da la lavur: a partir dal 1. da schaner 2024 u tenor cunvegna
Lieu da lavur: Cuira
Termin d'annunzia: 20 d'october 2023
Persuna da contact: Claudia Hartmann Lütscher, telefon 081 257 22 22, claudia.hartmann@staka.gr.ch