L'administraziun chantunala – ina patruna moderna per collavuraturas motivadas e collavuraturs motivads sco Vus.

praticum en il sectur biodiversitad e colliaziun (80–100 %)

Voss champ d'incumbensas: Vus ans sustegnais tar la realisaziun dals pajaments directs a l'agricultura en il sectur biodiversitad e colliaziun. Per quest intent collavurais Vus stretgamain cun ils biros ecologics incumbensads e sustegnais lur activitad. Vus elavurais e controllais las surfatschas da promoziun da la biodiversitad en il sistem d'infurmaziun geografica (SIG) e respundais dumondas da las puras e dals purs en connex cun la biodiversitad e cun la colliaziun. Plinavant survegnis Vus invista da las incumbensas multifaras dal post executiv chantunal per l'agricultura e dastgais cooperar a l'execuziun cun ils pli moderns meds da lavur. La plazza è limitada fin la fin da favrer 2024.

Voss profil: Vus stais curt avant la terminaziun d'in studi da scola auta u da scola auta spezialisada en agronomia, en biologia u en scienzas da l'ambient e da l'ecologia, ubain avais fatg dacurt il diplom e vulais approfundar Vossa savida cun rimnar emprimas experientschas professiunalas. D'avantatg èn experientschas en l'agricultura ed en ils secturs tematics biodiversitad, colliaziun e management da projects. Bunas enconuschientschas dal rumantsch e/u dal talian èn bainvegnidas.