L'administraziun chantunala – ina patruna moderna per collavuraturas motivadas e collavuraturs motivads sco Vus.
collavuratura academica u collavuratur academic (100 %)
Amt für Jagd und Fischerei
Ringstrasse 10
7001 Chur

Voss champ d'incumbensas: Sco biologa u biolog da selvaschina manais Vus la partiziun Selvaschina e chatscha da l'Uffizi da chatscha e pestga. Vus essas responsabla u responsabel per registrar, elavurar e preschentar en moda scientifica correcta las basas da la biologia da selvaschina e da l'ecologia per la planisaziun da la chatscha en il chantun Grischun. Vus manais ils differents projects da monitoring e da controlling en il rom dal management dals animals selvadis, sco stimaziuns dals effectivs, controllas da la preda, projects da plazzar emetturs e faschais evaluaziuns, preschentaziuns e rapports spezials. Tar ils rapports davart il guaud e davart la selvaschina manais Vus la part da la biologia da selvaschina sco er la stimaziun da donns da selvaschina en l'agricultura. En connex cun las spezias che dastgan vegnir sajettadas accumpagnais Vus plinavant eventualas retschertgas scientificas da la biologia da selvaschina e da l'ecologia dals animals selvadis. Ultra da quai elavurais Vus en moda independenta differents dossiers specifics e da spezias en il sectur da la realisaziun concreta da la planisaziun da la chatscha (fatgs da tir, examen da chatscha). Ina rolla impurtanta gioga en quest connex la collavuraziun specifica cun auters uffizis chantunals e naziunals, cun organisaziuns da chatscha ed organisaziuns per la protecziun da la natira sco er cun ulteriuras represchentanzas d'interess. Vus elavurais er basas per la scolaziun e per la furmaziun supplementara da las chatschadras e dals chatschaders sco er da la populaziun che na va betg a chatscha.

Voss profil: Vus avais absolvì inascolaziun en scienzas natiralas ad ina scola auta spezialisada u ad in'universitad en biologia da selvaschina, en ecologia da selvaschina, en biologia u en scienzas natiralas da l'ambient sco er experientschas professiunalas praticas cun ina furmaziun supplementara correspundenta. Enconuschientschas specificas fundadas da la biologia da selvaschina e da l'ecologia da selvaschina sco er da la biologia da mamifers e da l'ornitologia vegnan permessas. Medemamain in pensar ecologic exprimì cun enconuschientschas profundas da la protecziun dal spazi da viver e dal management da habitats. Experientscha pratica da la chatscha, da preferenza da la chatscha grischuna u d'auters sistems da chatscha (da patenta) èn d'avantatg.
Vus enconuschais las metodas d'analisa statisticas usitadas. Ina buna expressiun en scrit ed a bucca per tudestg vegn premessa; giavischadas èn plinavant enconuschientschas dal talian. Per finir As qualifitgais Vus tras Vossa capacitad da recepziun e d'emprender, tras Voss dun da contractar e da preschentar sco er tras Vossa moda da lavurar conscienziusa, flexibla ed independenta.

Grad d'occupaziun: 100 %
Cumenzament da la lavur: 1. da favrer 2023 (u tenor cunvegna)
Lieu da lavur: Cuira
Termin d'annunzia: 10 da fanadur 2022
Persuna da contact: dr. Adrian Arquint, manader da l'Uffizi da chatscha e pestga, adrian.arquint@ajf.gr.ch

Nus ans legrain da Vossa annunzia electronica cumpletta.