L'administraziun chantunala – ina patruna moderna per collavuraturas motivadas e collavuraturs motivads sco Vus.
revisura u revisur dals fatgs da construcziun (80–100 %)

Controlla da finanzas

Steinbruchstrasse 18

7001 Cuira

Voss champ d'incumbensas: La Controlla da finanzas è l'organ spezialisà suprem da la surveglianza da finanzas. Ella sustegna il Cussegl grond en sia incumbensa constituziunala da survegliar las finanzas e la Regenza en la surveglianza da las finanzas da l'administraziun. Sco experta u expert dal sectur da construcziun controllais Vus ch'ils projects da construcziun sajan vegnids realisads confurm a l'urden ed en moda economica sco er che las controllas internas ed ils process sajan cunvegnents. L'examinaziun dal quint annual dal chantun e da las finanzas dals posts da servetschs en il champ da construcziun tutgan medemamain tar vossas incumbensas. Cun Vossas examinaziuns gidais Vus a minimar las ristgas ed ad optimar ils process da gestiun. Cun la rapportaziun generais Vus plivalurs sco er segirezza per ils posts controllads e per las instanzas politicas.

Voss profil: Vus avais terminà ina scolaziun en il sectur da construcziun (architecta u architect, inschignera u inschigner da construcziun, manadra u manader da construcziun u scolaziun equivalenta) ed avais experientscha professiunala da plirs onns. Alternativamain avais Vus fatg ina scolaziun en contabilitad u en economia da manaschi d'ina scola auta spezialisada/universitad cun experientscha en il sectur da construcziun u da revisiun ed avais la prontezza d'absolver ina furmaziun supplementara correspundenta. Vus essas disada u disà da lavurar en moda independenta ed avais ina gronda conscienza per la qualitad ed ina gronda prontezza da furnir prestaziuns. Vus cuntanschais Vossa finamira cun As concentrar sin l'essenzial, e Vus essas adina pronta u pront da prender per mauns novas sfidas. En discurs stgaffis Vus in clima da stima e da respect e pudais represchentar ed argumentar Voss puntgs da vista. Per rediger rapports pretensius èsi necessari d'avair ina fitg buna expressiun en scrit en tudestg. Vus essas ina persunalitad dinamica ch'è abla da lavurar en in team ed avais in pensar analitic ed interdisciplinar. Sche nus avain sveglià Voss interess, lura ans legrain nus da Vossa annunzia online.

Grad d'occupaziun: 80–100 %

Cumenzament da la lavur: 1. da fanadur 2022

Lieu da lavur: Cuira

Termin d'annunzia: 7 da favrer 2022

Persuna da contact: Martin Blumenthal, telefon 081 257 32 95, martin.blumenthal@fiko.gr.ch

Nus ans legrain da Vossa annunzia electronica cumpletta.