L'administraziun chantunala – ina patruna moderna per collavuraturas motivadas e collavuraturs motivads sco Vus.
collavuratura giuridica u collavuratur giuridic (80–100 %)

Secretariat dal DIEM

Ringstrasse 10

7001 Cuira

Voss champ d'incumbensas: Il Departament d'infrastructura, energia e mobilitad (DIEM) cumpiglia ils secturs energia, traffic public, construcziun bassa, construcziun auta, guaud e privels da la natira sco er chatscha e pestga. El è structurà en tschintg uffizis sco er en il Secretariat dal departament che sustegna – sco organ da stab central – il schef dal departament tar la direcziun materiala e politica dal departament. En il nov center administrativ "sinergia" a Cuira vest lavura il DIEM en in ambient modern, avert e digital. Uras da lavur flexiblas, pussaivladads da sa perfecziunar ed il barat quotidian en il team procuran per in ambient da lavur attractiv.

Il Secretariat dal Departament d'infrastructura, energia e mobilitad planisescha, coordinescha e surveglia, sco liom tranter il departament ed ils posts da servetsch, las fatschentas ch'al èn vegnidas surdadas, ademplescha incumbensas administrativas e tgira il contact cun numerus posts entaifer ed ordaifer l'administraziun chantunala. Tar las incumbensas centralas tutga l'assistenza giuridica dals posts da servetsch.

Per sustegnair il manader da la partiziun Vias, guaud e selvaschina tschertgain nus ina giurista u in giurist. Tar Vossas incumbensas tutga en spezial l'assistenza giuridica da las fatschentas attribuidas al departament en ils secturs construcziun da vias, construcziun idraulica, guaud sco er protecziun cunter privels da la natira. Quai en reguard general e giuridic cun il focus sin dumondas ecologicas en il sectur da l'infrastructura. Plinavant procurais Vus per in andament ordinà da las fatschentas cun ils posts da servetsch attribuids a l'assistenza giuridica ed elavurais incaricas spezialas dal manader da la partiziun, en spezial pertutgant dumondas da la chatscha e da la pestga. Vus preparais conclus da la Regenza, disposiziuns, rapports e posiziuns sco er sbozs tar missivas, tar intervenziuns parlamentaras e tar decrets giuridics en ils secturs attribuids. Ultra da quai instruis ed elavurais Vus recurs e redigis scrittiras giuridicas per mauns da las dretgiras.

Voss profil: Per questas incumbensas variadas avais Vus terminà in studi universitar da giurisprudenza e possedais da preferenza ina patenta d'advocata u d'advocat. Experientschas praticas en ils conturns d'ina administraziun publica èn d'avantatg. Vus essas abla u abel d'elavurar fatgs cumplexs fin ch'els èn pronts per la decisiun. Vus essas ina persuna motivada, avais iniziativa, essas abla u abel da supportar squitsch e savais lavurar en in team. Vus disponis da bunas abilitads communicativas sco er d'in dun da contractar. I vegn premess che Vus sappias irreproschablamain tudestg. Giavischadas èn enconuschientschas dal rumantsch e/u dal talian.

Grad d'occupaziun: 80–100 %

Cumenzament da la lavur: 1. da fanadur 2021 u tenor cunvegna

Lieu da lavur: Cuira

Termin d'annunzia: 30 da zercladur 2021

Persuna da contact: Giusep Quinter, telefon 081 257 36 77, Giusep.Quinter@diem.gr.ch u Christian Tannò, telefon 081 257 36 70, Christian.Tanno@diem.gr.ch

Nus ans legrain da Vossa annunzia electronica cumpletta.