L'administraziun chantunala – ina patruna moderna per collavuraturas motivadas e collavuraturs motivads sco Vus.
collavuratura academica u collavuratur academic en il stab dal sectur Scola regulara (80–100 %)

Uffizi per la scola populara ed il sport

Quaderstrasse 17

7000 Cuira

Voss champ d'incumbensas: L'Uffizi per la scola populara ed il sport è il pli grond dals trais uffizis da furmaziun dal Departament d'educaziun, cultura e protecziun da l'ambient. El cumpiglia quatter partiziuns ed in sectur da stab cun differentas incumbensas interdisciplinaras. En Vossa funcziun sco collavuratura academica u collavuratur academic dal sectur da la scola populara lavurais Vus en il stab da l'uffizi. La scola populara dal Grischun è caracterisada d'ina dinamica impressiunanta cun in ferm svilup en quai che reguarda il cuntegn sco er las structuras. Gronds giavischs socials vegnan reproducids sur process politics en la concepziun da la scola populara. L'Uffizi per la scola populara ed il sport prepara tenor l'incumbensa surordinada las parts correspundentas da la legislaziun e da las missivas, ordinaziuns, instrucziuns, directivas e concepts che sa basan sin questa legislaziun. El sviluppa plans d'instrucziun e documents da basa per il sectur da furmaziun e d'educaziun, realisescha quels en la cuntrada da scola grischuna e tschertga en quest connex la collavuraziun cun auters chantuns. Vus As muvais en quests conturns tematics interessants, duraivels e da gronda responsabladad. Da Vossas incumbensas principalas fai part da surpigliar incumbensas decisivas da l'uffizi e da sviluppar documents da basa prospectivs per ils purtaders da decisiuns suandants, sco la direcziun da l'uffizi, il departament, la Regenza ed il parlament. Vus redigis notizias d'acta, disposiziuns da l'uffizi e dal departament sco er conclus da la Regenza e parts da missivas per il parlament. Da preferenza collavurais Vus er en gruppas da lavur chantunalas u interchantunalas pli grondas. Vus cumplettais in team fitg motivà e gidais activamain – grazia a Vossa cumpetenza sociala marcanta e cun Vossa savida spezialisada e professiunala – a sviluppar vinavant la scola populara. 

Voss profil: Sco persuna d'instrucziun scolada dal stgalim da la scola populara avais Vus almain in diplom dal stgalim ed avais rimnà experientschas sche pussaivel sin plirs stgalims da scola, u Vus avais in diplom universitar, en il cas ideal en direcziun da l'educaziun u da la furmaziun. En Vossa pratica professiunala da fin ussa avais Vus rimnà experientschas multifaras ed essas As furmada u furmà vinavant. Vus enconuschais bain il sistem da scola grischun cun sias trais culturas linguisticas. Vus essas disada u disà da lavurar en moda independenta sco er da collavurar en in team da project. Vus avais grondas cumpetenzas en l'applicaziun dal tudestg tant en scrit sco a bucca, sviluppais independentamain elements constitutivs per differents geners da texts e savais sche pussaivel ina segunda lingua chantunala sco er da preferenza anc englais. Iniziativa, in grond senn da responsabladad, prontezza d'As introducir en novs champs d'incumbensas, fitg buna abilitad d'analisa e da reflexiun, abilitad da lavurar en in team, abilitad da supportar squitsch, interess e flexibilitad èn premissas impurtantas per pudair dumagnar cun success las incumbensas en dumonda. Vus essas ultra da quai en cas da preparar lavurs concepziunalas pretensiusas. Tar Voss champ d'incumbensas tutgan la liquidaziun da pendenzas cumplexas da las fatschentas quotidianas e la surpigliada da dossiers tematics. 

Grad d'occupaziun: 80–100 %

Cumenzament da la lavur: 1. d'avrigl 2021 u tenor cunvegna

Lieu da lavurCuira

Termin d'annunzia: 31 da schaner 2021

Persuna da contact: Chantal Marti, telefon 081 257 27 50, Chantal.Marti@avs.gr.ch


Nus ans legrain da Vossa annunzia electronica cumpletta.