commerzianta u commerziant – Administraziun da taglia, Cuira (profil E, M) (2021)
Champ d'incumbensas
Ti organiseschas sesidas, tgiras la correspundenza, fas protocols e notizias d'acta, has contact telefonic e direct cun la clientella interna ed externa, legias actas e ta procuras infurmaziuns. Ti gidas en la contabilitad e sas interpretar in preventiv. En tia lavur quotidiana vegns ti sustegnida/sustegnì da sistems moderns da communicaziun e d'informatica. 

Senza rotaziun
Scolaziun en in grond post da servetsch (p.ex. administraziun da taglia; uffizi per la furmaziun professiunala; uffizi per industria, mastergn e lavur). Ti lavuras durant tut tes emprendissadi en in post da servetsch, midas dentant internamain adina puspè la partiziun. En quest model t'acquistas ti enconuschientschas pli profundas davart in post da servetsch.

Emprendissadi da Sport
L'emprendissadi da sport a la scola professiunala d'economia a Cuira ha la finamira da pussibilitar a sportistas/sportists da prestaziun giuvens da far la scolaziun sco commerzianta AFQ/commerziant AFQ en tut ils profils. La purschida sa basa sin questas quatter pitgas:

- prolungaziun dal temp d'emprendissadi sin 4 onns (3 onns instrucziun en scola/4 onns instrucziun en il manaschi)
- graduaziun temporara da la procedura da qualificaziun
- coordinaziun da las instrucziuns en scola ed en il manaschi
- sustegn tar l'instrucziun en scola

Ti stos avair ina carta da talent da Swiss olympic e far part d'in cader naziunal/regiunal. Ti absolvas durant almain 10 uras per emna (senza temp da viadi, concurrenzas, gieu e.u.v.) ina purschida da trenament sut surveglianza, ch'è specifica per la disciplina da sport e treneschas en disciplinas da sport, cun cundiziuns generalas e cun structuras che persvadan areguard la qualitad.

Il manaschi d'emprendissadi s'oblighescha – en il rom d'ina cunvegna supplementara al contract d'emprendissadi – da conceder a la sportista/al sportist da la generaziun giuvna absenzas regularas ed irregularas sco er a curta vista per activitads sportivas (trenaments regulars entaifer il temp da lavur, champs da trenament, concurrenzas e.u.v.), uschenavant ch'ils andaments manaschials pussibiliteschan quai.
Tias fermezzas èn
Accents da la scolaziun
La basa per la scolaziun manaschiala è – ultra da la promoziun da la part professiunala – il svilup da la cumpetenza metodica, sociala e persunala. Quai vul dir che ti t'acquistas durant tia scolaziun la savida e las enconuschientschas professiunalas da giudim ensi e che ti es en cas da dumagnar las pretensiuns en il sectur interuman e professiunal.
Pretensiun

Furmaziun da basa extendida (profil E): Commerziantas/commerziants cun il profil E han enconuschientschas teoreticas approfundadas dal sectur commerzial resp. economic.

Furmaziun da basa extendida cun maturitad professiunala (profil M): Commerziantas/commerziants che tschernan quest profil, sa preparan supplementarmain per la maturitad professiunala commerziala. Cun tala vegnan acquistads diploms da lingua renconuschids internaziunalmain sco er ina furmaziun generala approfundada.

Betg ponderescha ditg, mabain t'annunzia anc oz tar nus. Infurmaziuns detagliadas e video davart las singulas professiuns chattas sut www.lehre.gr.ch. Sche ti has anc dumondas u vulessas savair dapli davart la professiun giavischada, lura dà simplamain in Telefon:

Uffizi da persunal dal Grischun, Raffaella Bacchi, Telefon 081 257 32 38

Nus ans legrain da tia annunzia cun il curs da la vita ed ina fotografia sco er cun ils quatter ultims attestats da scola. Ta preschenta curtamain en ina brev e mussa, pertge che nus duessan tscherner gist tai sco proxima emprendista u proxim emprendist.
In emprendissadi tar il chantun ... Bun per las emprendistas ed ils emprendists – bun per il Grischun!