L'administraziun chantunala – ina patruna moderna per collavuraturas motivadas e collavuraturs motivads sco Vus.
inschignera u inschigner per la protecziun cunter la canera – execuziun OPC (80 - 100 %)
Amt für Natur und Umwelt
Gürtelstrasse 89
7000 Chur

Voss champ d'incumbensas: En il rom da la cumpetenza da l'uffizi essas Vus responsabla u responsabel per l'execuziun da l'Ordinaziun davart la protecziun cunter canera (OPC) e da l'Ordinaziun tar la Lescha federala davart la protecziun cunter ils privels da las radiaziuns nunionisantas e dal sun (O-LRNIS). Ultra da suns da l'aria tutgan er vibraziuns e ramurs tramessas d'in corp solid en Voss sectur spezial. Vus cussegliais e sustegnais las vischnancas ad exequir las prescripziuns da protecziun cunter canera, per las qualas ellas èn responsablas. Ultra da quai formulais Vus posiziuns specificas davart projects da planisaziun. Vus sustegnais l'uffizi a prender posiziun en il rom da consultaziuns da la Confederaziun u en il rom d'intervenziuns parlamentaras che concernan Voss sectur spezial. Sche necessari faschais Vus retschertgas e mesiraziuns per eruir e per giuditgar immissiuns da suns da l'aria e da ramurs tramessas d'in corp solid. Vus faschais ed actualisais ils catasters chantunals da la grevezza da canera per vias, viafiers e stans da tir. En quest connex tgirais e mantegnais Vus il model chantunal da traffic e sustegnais l'Uffizi chantunal da construcziun bassa a realisar projects da sanaziun cunter la canera da via. En cas da basegn faschais Vus dumbraziuns dal traffic ed evaluais quellas. En il rom da Vossa activitad tgirais Vus plinavant in contact specific e direct cun ils posts d'administraziun da la Confederaziun e dals chantuns, cun uffizis colleghials e cun vischnancas, cun federaziuns spezialisadas sco er cun firmas e cun persunas privatas. En il rom da Vossa funcziun da substituziun essas Vus responsabla u responsabel per l'execuziun da l'Ordinaziun davart la protecziun cunter radiaziuns nunionisantas (ORNI) tar implants da transmissiun e d'electricitad.

Voss profil: Vus avais terminà in studi ad ina scola auta u ad ina scola auta spezialisada en il sectur tecnic da las scienzas natiralas u avais ina scolaziun equivalenta ed intgins onns experientscha professiunala, da preferenza en l'acustica da l'ambient. Vus avais experientschas en la mesiraziun da canera e da vibraziuns e savais applitgar programs per calcular grevezzas da canera e da vibraziuns sco er lavurar cun bancas da datas e cun sistems d'infurmaziun geografica (SIG). Vus essas disada u disà d'avair contact cun la clientella ed As preschentais cun respect envers las gruppas da contact. Vus savais As far valair e mantegnais la quietezza e la prudientscha en situaziuns da conflict. Vus avais abilitads organisatoricas e communicativas en il team ed essas ina persunalitad iniziativa che pensa tenor princips d'interpresa e che ha ina gronda prontezza a l'acziun. Premess vegni che Vus sappias perfetgamain tudestg a bucca ed en scrit per pudair ademplir las incumbensas attribuidas. Enconuschientschas d'ina segunda lingua chantunala (rumantsch u talian) e la scolaziun sco acusticra u acusticher SGA èn d'avantatg.

Grad d'occupaziun: 80 - 100 %
Cumenzament da la lavur: 1. d'avust 2020 u tenor cunvegna
Lieu da lavur: Cuira
Termin d'annunzia: 29 da favrer 2020
Persuna da contact: dr. Georg Thomann, telefon 081 257 29 52, georg.thomann@anu.gr.ch

Nus ans legrain da Vossa annunzia electronica cumpletta.